Television de Catalonha incremente era preséncia der aranés en antena e en portau d'internet

Television de Catalonha incremente a compdar de deluns era preséncia der aranés en antena damb era estrena en 3/24 d'ua ròda d'informacion generau en lengua aranesa entà tot eth territòri. Era ròda, presentada pera periodista aranesa Ares Riu, s'emeterà de deluns a diuendres, tàs 16.45 ores.

Era ròda en aranés deth 3/24 inclodirà es notícies mès subergesentes deth dia en Catalonha e en tot eth món, ath delà dera informacion esportiua dera jornada. Serà ua ròda d'informacion generau, mès en lengua aranesa e entà tot eth territòri, ua iniciativa de Television de Catalonha innavadora e inedita en panorama informatiu catalan.

Parallelament ara estrena dera naua ofèrta informativa en aranés en 3/24, Television de Catalonha tanben met en foncionament deluns ua naua seccion en portau tv3.cat on se higeran toti es contenguts relacionadi damb era Val d'Aran, siguen espacis produsits en aranés o doblats en aguesta lengua.

A trauèrs dera plana www.tv3.cat/aran es usatgèrs poderan accedir cada dia ara ròda informativa en aranés deth 3/24, ara edicion deth "TN Comarques" entara Val d'Aran, es diuendres, e as vidèus de produccions que Television de Catalonha ja a emetut en aranés, espacis coma "Es Pirenèus des der aire" o ben era seria infantila "Ua man de condes".

Era naua seccion deth portau tanben informarà puntualament des programes naui que s'aufrisquen en aranés.

Informatius, espòrts, produccions infantiles e documentaus

Er increment dera preséncia der aranés tant ena emission televisiva com en portau de TV3 en internet se hig as esfòrci que des de hè lèu dues decades Television de Catalonha hè entà aufrir en aguesta lengua produccions de diuèrsi ambits.
Era passada temporada, eth Departament d'Espòrts de TVC transmetrec per prumèr viatge en aranés un partit de fotbòl, concretament era finau de Copa de Valéncia, ua iniciativa qu'aurà continuitat en d'auti partits d'ua rellevància especiau.

Eth fotbòl siguec eth darrèr pas d'un recorrut qu'era cadena inicièc en an 91 damb era estrena d'ua edicion deth "TN Comarques" en aranés, un informatiu a cargue de Jovita Ané que s'emet cada diuendres en desconnexion e que pendent aguesti ans a estat testimòni de toti es eveniments destacats dera vida sociau, economica e culturau dera Val.
D'alavetz ençà, TVC tanben a doblat e emetut en aranés produccions infantiles destacades coma "Ua man de condes", diversi reportatges de "30 minuts", reportatges esportius e era seria documentau "Es Pirenèus des der aire".

Er aranés enes emissores de Catalonha Ràdio

Ath delà, eth grop d'emissores de Catalonha Ràdio emet programes en desconnexion en aranés des der an 1988. Eth magazín "Meddia aranés", damb més de 20 ans d'istòria, s'a convertit en un referent ena Val e actualament a ua edicion ath maitin e ua auta ara vrespada. Er an 2007 se metec en foncionament ua naua escomesa pera difusion der aranés consistent en un blòc informatiu diari de Catalonha Informacion entàs uèit deth maitin en desconnexion tara Val damb tota era actualitat de Catalonha e eth món en lengua aranesa en orari de maxima audiéncia radiofonica.

Lieg era noticia en catalan:
http://www.tv3.cat/actualitat/135661/TV3-incrementa-la-presencia-de-laranes-a-la-tele-i-a-internet